Purr-fekte Valentyn

Madre Henning het lankal die kuns vervolmaak om verhoudings te vermy—romanties of andersins. Haar passie lê in die kombuis, waar sy kulinêre meesterstukke skep, nie sprokies nie. Maar wanneer sy instem om ’n guns vir haar beste vriendin te doen en ‘n ete voor te berei vir ‘n Kaapse sakeman, het sy nie gedink dit sal maak dat haar noukeurig geordende lewe uitrafel nie.
Daiki Hamamoto is altyd op pad—nuwe stede, nuwe gesigte, en geen bande nie. Maar sy skuif na Kaapstad vir werk bring hom voor Madre te staan. Vir die eerste keer smag hy na meer as net die volgende avontuur. Vasbeslote om te wys hy is gereed om te bly, beplan Daiki ’n onvergeetlike Valentynsdag, kompleet met roosblare, ’n tikkie romanse, en twee onhebbelike katte wat as maatsoekers optree.
Terwyl roosblare die pad voorberei vir bekentenisse en beloftes van iets meer, moet Madre en Daiki besluit of hulle bereid is om ’n kans te vat op die een ding wat hulle altyd probeer vermy het: liefde.
Hierdie Valentynsdag mag liefde dalk net op die spyskaart wees… as hulle dapper genoeg is om die eerste happie te neem.